Roderick Galdes huwa politiku Malti elett fil-Parlament Malti, sa mill-2004. Bħalissa huwa membru tal-Kabinett tal-Ministri tal-Gvern ta’ Malta u jservi bħala Ministru għall-Akkomodazzjoni Soċjali u Affordabbli.
Preċedentement serva bħala Segretarju Parlamentari għall-Biedja, Sajd u Drittijiet tal-Annimali. Mis-sena 1994 ’il quddiem serva bħala kunsillier fil-lokalità ta’ Ħal Qormi, kif ukoll bħala Sindku mill-2001 sal-2004. Ġie elett fil-Parlament fl-2004, u reġa’ ġie elett fl-elezzjonijiet tal-2008, 2013, 2017 u 2022 mis-Sitt Distrett li jinkludi raħal twelidu, Ħal Qormi, flimkien ma’ Ħal Luqa, is-Siġġiewi u partijiet minn Ħaż-Żebbuġ.
Roderick Galdes gradwat b’Masters fl-Istudji tal-Istati tal-Gżejjer Żgħar (Masters in Small Islands States) mill-Università ta’ Malta, b’Baċellerat fl-Ippjanar Urban (Bachelors in Urban Planning) mill-istess università, u b’Diploma fl-Istudji tal-Ippjanar (Diploma in Planning Studies).
Huwa miżżewweġ lil Joanne Galdes (née Carabott), u huwa missier ta’ tlett itfal: Daniel, Andrew u Nathan.