Il-Ministeru għall-Akkomodazzjoni u l-Artijiet huwa responsabbli mill-iżvilupp u l-implimentazzjoni tal-politika tal-Gvern fil-qasam tal-akkomodazzjoni u l-ġestjoni tal-artijiet u l-proprjetà pubblika.
Il-ħidma tal-Ministeru tiffoka fuq li jiġi żgurat li l-familji u l-individwi jkollhom aċċess għal akkomodazzjoni adegwata u affordabbli, filwaqt li jiġu żviluppati soluzzjonijiet sostenibbli għall-isfidi li jħabbtu wiċċhom magħhom dawk li qed ifittxu akkomodazzjoni.
Fost l-oqsma ewlenin ta’ responsabbiltà hemm l-akkomodazzjoni soċjali, l-akkomodazzjoni affordabbli, il-kera, it-titjib u l-manutenzjoni tal-Housing Estates, kif ukoll l-iżvilupp ta’ inizjattivi li jiffaċilitaw is-sjieda tad-djar.
Il-Ministeru huwa wkoll responsabbli mill-ġestjoni tal-artijiet u l-proprjetà tal-Gvern, inkluż permezz tal-Awtorità tal-Artijiet, l-Uffiċċju Konġunt u l-Aġenzija għar-Reġistrazzjoni tal-Artijiet.
Permezz ta’ kollaborazzjoni kontinwa mal-entitajiet tiegħu, mal-awtoritajiet lokali, mas-settur privat u ma’ partijiet interessati oħra, il-Ministeru jimmira li jsaħħaħ il-kwalità tal-akkomodazzjoni, jagħmel użu aħjar mir-riżorsi pubbliċi u jikkontribwixxi għal komunitajiet aktar sostenibbli.
No more posts
